นิคมนกถาวณฺณนา

อวสานคาถาสุ ปน อยมตฺโถฯ วิภตฺตเทสนนฺติ อุภโตวิภงฺคขนฺธกปริวาเรหิ วิภตฺตเทสนํ วินยปิฏกนฺติ โยเชตพฺพํฯ ตสฺสาติ ตสฺส วินยสฺสฯ

ตตฺริทนฺติอาทิ ปฐมปาราชิกวณฺณนายํ วุตฺตนยเมวฯ

สตฺถุมหาโพธิวิภูสิโตติ สตฺถุนา ปริภุตฺตมหาโพธิวิภูสิโต มณฺฑิโต, ตสฺส มหาวิหารสฺส ทกฺขิณภาเค อุตฺตมํ ยํ ปธานฆรนฺติ สมฺพนฺโธฯ ตตฺถ ปธานฆรนฺติ ตํนามกํ ปริเวณํฯ สุจิจาริตฺตสีเลน, ภิกฺขุสงฺเฆน เสวิตนฺติ อิทมฺปิ ปธานฆรวิเสสนํฯ

ตตฺถาติ ตสฺมิํ ปธานฆเรฯ จารุปาการสญฺจิตนฺติ มนาเปน ปากาเรน ปริกฺขิตฺตํฯ สีตจฺฉายตรูเปตนฺติ ฆนนิจิตปตฺตสญฺฉนฺนสาขาปสาขตาย สีตจฺฉาเยหิ รุกฺเขหิ อุเปตํฯ วิกสิตกมลกุวลยปุณฺฑรีกโสคนฺธิกาทิปุปฺผสญฺฉนฺนมธุรสีตลุทกปุณฺณตาย สมฺปนฺนา สลิลาสยา อสฺสาติ สมฺปนฺนสลิลาสโยฯ อุทฺทิสิตฺวาติ พุทฺธสิริํ นาม เถรํ นิสฺสาย, ตสฺส อชฺเฌสนํ นิสฺสายาติ วุตฺตํ โหติฯ อิทฺธาติ อตฺถวินิจฺฉยาทีหิ อิทฺธา ผีตา ปริปุณฺณาฯ

สิรินิวาสสฺสาติ สิริยา นิวาสฏฺฐานภูตสฺสฯ ชยสํวจฺฉเรติ ชยปฺปตฺตสํวจฺฉเรฯ อยนฺติ เถรํ พุทฺธสิริํ อุทฺทิสฺส ยา วินยวณฺณนา อารทฺธา, อยํฯ ธมฺมูปสํหิตาติ กุสลสนฺนิสฺสิตาฯ อิทานิ สเทวกสฺส โลกสฺส อจฺจนฺตสุขาธิคมาย อตฺตโน ปุญฺญํ ปริณาเมนฺโต ‘‘จิรฏฺฐิตตฺถ ธมฺมสฺสา’’ติอาทิมาห ฯ ตตฺถ สมาจิตนฺติ อุปจิตํฯ สพฺพสฺส อานุภาเวนาติ สพฺพสฺส ตสฺส ปุญฺญสฺส เตเชนฯ สพฺเพปิ ปาณิโนติ กามาวจราทิเภทา สพฺเพ สตฺตาฯ สทฺธมฺมรสเสวิโนติ ยถารหํ โพธิตฺตยาธิคมวเสน สทฺธมฺมรสเสวิโน ภวนฺตุฯ เสสเมตฺถ สุวิญฺเญยฺยเมวฯ

นิคมนกถาวณฺณนา นิฏฺฐิตาฯ