เมนู

สงฺคามทฺวยวณฺณนา

[365] ฐานนิสชฺชวตฺตาทินิสฺสิตาติ ‘‘เอวํ ฐาตพฺพํ, เอวํ นิสีทิตพฺพ’’นฺติ เอวมาทิกาฯ สญฺญาชนนตฺถนฺติ จุทิตกโจทกานํ สญฺญุปฺปาทนตฺถํฯ อนุโยควตฺตํ กถาเปตฺวาติ ‘‘กิํ อนุโยควตฺตํ ชานาสี’’ติ ปุจฺฉิตฺวา เตเนว กถาเปตฺวาฯ

[375] นีลาทิวณฺณาวณฺณวเสนาติ นีลาทิวณฺณวเสน อาโรคฺยตฺถาทิอวณฺณวเสน จฯ

กถินเภทวณฺณนา

[404] ปุเรชาตปจฺจเย ปเนส อุทฺทิฏฺฐธมฺเมสุ เอกธมฺมมฺปิ น ลภตีติ เอส อุทกาหรณาทิปโยโค อตฺตโน ปุเรชาตปจฺจยภาเว ปุพฺพกรณวเสน อุทฺทิฏฺเฐสุ โธวนาทิธมฺเมสุ เอกธมฺมมฺปิ น ลภติ อตฺตโน ปุเรชาตสฺส ปุพฺพกรณสงฺคหิตสฺส ธมฺมสฺส นตฺถิตายฯ

[412] รูปาทีสุ ธมฺเมสูติ วณฺณคนฺธาทีสุ สุทฺธฏฺฐกธมฺเมสุฯ

[416] ปุริมา ทฺเวติ อิมสฺมิํ อธิกาเร ปฐมํ วุตฺตา อนฺตรุพฺภารสหุพฺภารา, น ปกฺกมนนฺติกาทโย ทฺเว อุทฺธาราฯ

อุปาลิปญฺจกวณฺณนา

[420-421] โอมทฺทการโกติ โอมทฺทิตฺวา อภิภวิตฺวา การโกฯ อุปตฺถมฺโภ น ทาตพฺโพติ สามคฺคิวินาสาย อนุพลํ น ทาตพฺพํฯ ทิฏฺฐาวิกมฺมมฺปิ กตฺวาติ ‘‘น เมตํ ขมตี’’ติ ทิฏฺฐิํ อาวิ กตฺวาปิฯ

โวหารวคฺควณฺณนา

[424] กายปฺปโยเคน อาปชฺชิตพฺพา กายปฺปโยคาฯ วจีปโยเคน อาปชฺชิตพฺพา วจีปโยคาฯ นวสุ ฐาเนสูติ โอสารณาทีสุ นวสุ ฐาเนสุฯ ทฺวีสุ ฐาเนสูติ ญตฺติทุติยญตฺติจตุตฺถกมฺเมสุฯ ตสฺมาติ ยสฺมา มหาอฏฺฐกถายํ วุตฺตนเยน อุภโตวิภงฺคา อสงฺคหิตา, ตสฺมาฯ ยํ กุรุนฺทิยํ วุตฺตํ, ตํ คเหตพฺพนฺติ สมฺพนฺโธฯ

ทิฏฺฐาวิกมฺมวคฺควณฺณนา

[425] ‘‘จตูหิ ปญฺจหี’’ติ วจนโต ทฺวีหิ วา ตีหิ วา เอกโต เทเสตุํ วฏฺฏติ, ตโต ปรํ น วฏฺฏติฯ มาฬกสีมายาติ ขณฺฑสีมายฯ อวิปฺปวาสสีมายาติ มหาสีมายฯ

มุสาวาทวคฺควณฺณนา

[444] ปริยาเยน ชานนฺตสฺส วุตฺตมุสาวาโทติ ยสฺส กสฺสจิ ชานนฺตสฺส ปริยาเยน วุตฺตมุสาวาโทติ อตฺโถฯ

[446] อนุโยโค น ทาตพฺโพติ เตน วุตฺตํ อนาทิยิตฺวา ตุณฺหี ภวิตพฺพนฺติ อตฺโถฯ

ภิกฺขุโนวาทวคฺควณฺณนา

[454] เอกูนวีสติเภทายาติ มคฺคปจฺจเวกฺขณาทิวเสน เอกูนวีสติเภทายฯ

อธิกรณวูปสมวคฺควณฺณนา

[458] ปญฺจหิ การเณหีติ อิทํ อตฺถนิปฺผาทนกานิ เตสํ ปุพฺพภาคานิ จ การณภาวสามญฺเญน เอกชฺฌํ คเหตฺวา วุตฺตํ, น ปน สพฺเพสํ ปญฺจนฺนํ สมานโยคกฺเขมตฺตาฯ อนุสฺสาวเนนาติ เภทสฺส อนุรูปสาวเนนฯ ยถา เภโท โหติ, เอวํ ภินฺทิตพฺพานํ ภิกฺขูนํ อตฺตโน วจนสฺส สาวเนน วิญฺญาปเนนาติ อตฺโถฯ เตนาห ‘‘นนุ ตุมฺเห’’ติอาทิฯ กณฺณมูเล วจีเภทํ กตฺวาติ เอเตน ปากฏํ กตฺวา เภทกรวตฺถุทีปนํ โวหรณํฯ ตตฺถ อตฺตนา วินิจฺฉิตมตฺตํ รหสฺสวเสน วิญฺญาปนํ อนุสฺสาวนนฺติ ทสฺเสติฯ กมฺมเมว อุทฺเทโส วา ปมาณนฺติ เตหิ สงฺฆเภทสิทฺธิโต ปมาณํ, อิตเร ปน เตสํ สมฺภารภูตาฯ เตนาห ‘‘โวหารา’’ติอาทิฯ ตตฺถาติ โวหรเณฯ

กถินตฺถารวคฺควณฺณนา

[467] อนฺตรา วุตฺตการเณนาติ ‘‘ตญฺหิ วนฺทนฺตสฺส มญฺจปาทาทีสุปิ นลาฏํ ปฏิหญฺเญยฺยา’’ติอาทินา วุตฺตการเณนฯ