อตฺตาทานองฺคกถาวณฺณนา
[398] ปรํ โจเทตุํ อตฺตนา อาทาตพฺพํ คเหตพฺพํ อธิกรณํ อตฺตาทานํฯ เตนาห ‘‘สาสนํ โสเธตุกาโม’’ติอาทิฯ วสฺสารตฺโตติ วสฺสกาโลฯ
โจทเกน ปจฺจเวกฺขิตพฺพธมฺมกถาวณฺณนา
[399] ปฏิมาสิตุนฺติ ปรามสิตุํฯ ปลิโพเธ ฉินฺทิตฺวา…เป.… อธิคตํ เมตฺตจิตฺตนฺติ อิมินา อปฺปนาปฺปตฺตํ เมตฺตาภาวนํ ทสฺเสติฯ เตเนวาห ‘‘วิกฺขมฺภนวเสน วิหตาฆาต’’นฺติฯ
โจทเกน อุปฏฺฐาเปตพฺพธมฺมกถาวณฺณนา
[400] โน โทสนฺตโรติ เอตฺถ จิตฺตปริยาโย อนฺตร-สทฺโทติ อาห ‘‘น ทุฏฺฐจิตฺโต หุตฺวา’’ติฯ
โจทกจุทิตกปฏิสํยุตฺตกถาวณฺณนา
[401] กรุณนฺติ อปฺปนาปฺปตฺตํ กรุณชฺฌานํฯ กรุณาปุพฺพภาคนฺติ ปริกมฺมุปจารวสปฺปวตฺตํ กรุณํฯ เมตฺตญฺจ เมตฺตาปุพฺพภาคญฺจาติ เอตฺถาปิ เอเสว นโยฯ เสสเมตฺถ สุวิญฺเญยฺยเมวาติฯ
ปาติโมกฺขฏฺฐปนกฺขนฺธกวณฺณนา นิฏฺฐิตาฯ