ลิงฺคาทิทสฺสนกถาวณฺณนา
[179] อาจารสณฺฐานนฺติ อาจารสณฺฐิติฯ อากรียติ ปกาสียติ เอเตนาติ อากาโรฯ ลีนํ คมยติ โพเธตีติ ลิงฺคํฯ นิมิยนฺติ ปริจฺฉิชฺช ญายนฺติ เอเตนาติ นิมิตฺตํฯ อุทฺทิสียนฺติ อปทิสียนฺติ เอเตนาติ อุทฺเทโสฯ ‘‘อมฺหากํ อิท’’นฺติ อญฺญาตํ อวิทิตนฺติ อญฺญาตกํฯ ตญฺจ อตฺถโต ปรสนฺตกํเยวาติ อาห ‘‘อญฺเญสํ สนฺตก’’นฺติฯ
[180] นานาสํวาสกภาวนฺติ ลทฺธินานาสํวาสกภาวํฯ ตสฺส อภิภโว นาม เตสํ ลทฺธิวิสฺสชฺชาปนนฺติ อาห ‘‘ตํ ทิฏฺฐิํ น นิสฺสชฺชาเปนฺตีติ อตฺโถ’’ติฯ
นคนฺตพฺพคนฺตพฺพวารกถาวณฺณนา
[181] อุโปสถาธิฏฺฐานตฺถํ สีมาปิ นทีปิ น คนฺตพฺพาติ ครุกํ ปาติโมกฺขุทฺเทสํ วิสฺสชฺเชตฺวา ลหุกสฺส อกตฺตพฺพตฺตา วุตฺตํฯ อารญฺญเกนาปิ ภิกฺขุนาติ เอกจาริเกน อารญฺญกภิกฺขุนา, ยตฺถ วา สงฺฆปโหนกา ภิกฺขู น สนฺติ, ตาทิเส อรญฺเญ วสนฺเตนฯ ตตฺถ อุโปสถํ กตฺวาว คนฺตพฺพนฺติ ตสฺส วสนฏฺฐาเน สงฺฆุโปสถสฺส อปฺปวตฺตนโต วุตฺตํฯ อุโปสถนฺตราโยติ อตฺตโน อุโปสถนฺตราโยฯ
วชฺชนียปุคฺคลสนฺทสฺสนกถาวณฺณนา
[183] หตฺถปาสุปคมนเมว ปมาณนฺติ ภิกฺขุนีอาทโย ฐิตา วา โหนฺตุ นิสินฺนา วา, เตสํ หตฺถปาสุปคมนเมว อาปตฺติยา ปมาณนฺติ อธิปฺปาโย, ตสฺมา เอกสีมายมฺปิ หตฺถปาสํ ชหาเปตฺวา อุโปสถํ กาตุํ วฏฺฏติฯ เสสเมตฺถ อุตฺตานเมวฯ
อุโปสถกฺขนฺธกวณฺณนา นิฏฺฐิตาฯ
3. วสฺสูปนายิกกฺขนฺธกํ
วสฺสูปนายิกานุชานนกถาวณฺณนา
[184] วสฺสูปนายิกกฺขนฺธเก อิธ-สทฺโท นิปาตมตฺโตติ โอกาสปริทีปนสฺสปิ อสมฺภวโต อตฺถนฺตรสฺส อโพธนโต วุตฺตํฯ อปรชฺชุคตาย อสฺสาติ อิมินา อสมานาธิกรณวิสโย พาหิรตฺถสมาโสยนฺติ ทสฺเสติฯ อปรชฺชูติ อาสาฬฺหีปุณฺณมิโต อปรํ ทินํ, ปาฏิปทนฺติ อตฺโถฯ อสฺสาติ อาสาฬฺหีปุณฺณมิยาฯ
วสฺสาเน จาริกาปฏิกฺเขปาทิกถาวณฺณนา
[185] อนเปกฺขคมเนน วา อญฺญตฺถ อรุณํ อุฏฺฐาปเนน วา อาปตฺติ เวทิตพฺพาติ เอตฺถ อนเปกฺขคมเนน อุปจาราติกฺกเม อาปตฺติ เวทิตพฺพา, สาเปกฺขคมเนน อญฺญตฺถ อรุณุฏฺฐาปเนน อาปตฺติ เวทิตพฺพาฯ
สตฺตาหกรณียานุชานนกถาวณฺณนา
[187-189] ตีณิ ปริหีนานีติ ภิกฺขุนีนํ วจฺจกุฏิอาทีนํ ปฏิกฺขิตฺตตฺตา ปหีนานิฯ วาเรยฺยนฺติ อาวาหวิวาหมงฺคลํฯ สุตฺตนฺโตติ อตฺตโน ปคุณสุตฺตนฺโตฯ น ปลุชฺชตีติ น วินสฺสติ น อนฺตรธายติฯ