9. ฉตฺตุปาหนวคฺควณฺณนา

[1214] ฉตฺตุปาหนวคฺคสฺส เอกาทสเม อุปจารํ สนฺธายาติ สมนฺตา ทฺวาทสหตฺถุปจารํ สนฺธายฯ เสสํ สพฺพตฺถ อุตฺตานเมวฯ

ฉตฺตุปาหนวคฺควณฺณนา นิฏฺฐิตาฯ

คิรคฺคสมชฺชาทีนิ อจิตฺตกานิ โลกวชฺชานีติ วุตฺตตฺตา นจฺจนฺติ วา วณฺณกนฺติ วา อชานิตฺวาว ปสฺสนฺติยา วา นหายนฺติยา วา อาปตฺติสมฺภวโต วตฺถุอชานนจิตฺเตน อจิตฺตกานิ, นจฺจนฺติ วา วณฺณกนฺติ วา ชานิตฺวา ปสฺสนฺติยา วา นหายนฺติยา วา อกุสเลเนว อาปชฺชนโต โลกวชฺชานีติ เวทิตพฺพานิฯ โจรีวุฏฺฐาปนาทีนิ โจรีติอาทินา วตฺถุํ ชานิตฺวา กรเณ เอว อาปตฺติสมฺภวโต สจิตฺตกานิ, อุปสมฺปทาทีนํ เอกนฺตอกุสลจิตฺเตเนว อกตฺตพฺพตฺตา ปณฺณตฺติวชฺชานิฯ ‘‘อิธ สจิตฺตกาจิตฺตกตา ปณฺณตฺติชานนาชานนตาย อคฺคเหตฺวา วตฺถุชานนาชานนตาย คเหตพฺพา’’ติ ตีสุปิ คณฺฐิปเทสุ วุตฺตํฯ เสสเมตฺถ อุตฺตานตฺถเมวฯ

ภิกฺขุนีวิภงฺเค ขุทฺทกวณฺณนา นิฏฺฐิตาฯ

ปาจิตฺติยกณฺฑํ นิฏฺฐิตํฯ