[916] อฏฺฐเม กุมฺภถูณํ นาม กุมฺภสทฺโท, เตน จรนฺติ กีฬนฺติ, ตํ วา สิปฺปํ เอเตสนฺติ กุมฺภถูณิกาฯ เตนาห ‘‘ฆฏเกน กีฬนกา’’ติฯ ทีฆนิกายฏฺฐกถายํ (ที. นิ. อฏฺฐ. 1.13) ปน ‘‘กุมฺภถูณํ นาม จตุรสฺสอมฺพณกตาฬ’’นฺติ วุตฺตํฯ จตุรสฺสอมฺพณกตาฬํ นาม รุกฺขสารทนฺตาทีสุ เยน เกนจิ จตุรสฺสอมฺพณํ กตฺวา จตูสุ ปสฺเสสุ จมฺเมน โอนนฺธิตฺวา กตวาทิตภณฺฑํฯ พิมฺพิสกนฺติปิ ตสฺเสว เววจนํ, ตํ วาเทนฺติ, ตํ วา สิปฺปํ เอเตสนฺติ กุมฺภถูณิกาฯ เตนาห ‘‘พิมฺพิสกวาทกาติปิ วทนฺตี’’ติฯ สมณจีวรตา, ฐเปตฺวา สหธมฺมิเก มาตาปิตโร จ อญฺเญสํ ทานํ, อตาวกาลิกตาติ อิมานิ ปเนตฺถ ตีณิ องฺคานิฯ

[920] นวมํ อุตฺตานตฺถเมวฯ

[927] ทสเม ธมฺมิกํ กถินุทฺธารนฺติ สพฺพาสํ ภิกฺขุนีนํ อกาลจีวรํ ทาตุกาเมน อุปาสเกน ยตฺตโก อตฺถารมูลโก อานิสํโส, ตโต อธิกํ วา สมกํ วา ทตฺวา ยาจิตเกน สมคฺเคน ภิกฺขุนิสงฺเฆน ยํ กถินํ ญตฺติทุติเยน กมฺเมน อนฺตรา อุทฺธรียติ, ตสฺส โส อุทฺธาโร ธมฺมิโกติ วุจฺจติ, เอวรูปํ กถินุทฺธารนฺติ อตฺโถฯ เสสํ อุตฺตานตฺถเมวฯ

นคฺควคฺควณฺณนา นิฏฺฐิตาฯ

[932] ตุวฏฺฏวคฺเค สพฺพํ อุตฺตานเมวฯ

5. จิตฺตาคารวคฺควณฺณนา

[978] จิตฺตาคารวคฺคสฺส ปฐเม กีฬนอุปวนนฺติ อนฺโตนคเร ฐิตํ สนฺธาย วุตฺตํ, กีฬนุยฺยานนฺติ พหินคเร ฐิตํ สนฺธายฯ ปาเฏกฺกา อาปตฺติโยติ คีวาย ปริวฏฺฏนปฺปโยคคณนาย อาปตฺติโย, น อุมฺมีลนคณนายฯ ‘‘อชฺฌาราเม ราชาคาราทีนิ กโรนฺติ , ตานิ ปสฺสนฺติยา อนาปตฺตี’’ติ วจนโต ‘‘อนฺโตอาราเม ตตฺถ ตตฺถ คนฺตฺวา นจฺจาทีนิ ปสฺสิตุํ ลภตี’’ติปิ สิทฺธํฯ

[982] ทุติยาทีนิ อุตฺตานตฺถาเนวฯ

[1015] นวเม หตฺถิอาทีสุ สิปฺป-สทฺโท ปจฺเจกํ โยเชตพฺโพ, ตถา อาถพฺพณาทีสุ มนฺต-สทฺโทฯ ตตฺถ อาถพฺพณมนฺโต นาม อาถพฺพณเวทวิหิโต ปรูปฆาตกโร มนฺโต, ขีลนมนฺโต นาม ทารุสารขีลํ มนฺเตตฺวา ปถวิยํ ปเวเสตฺวา มารณมนฺโต, อคทปฺปโยโค วิสโยชนํฯ นาคมณฺฑลนฺติ สปฺปานํ ปเวสนิวารณตฺถํ มณฺฑลพทฺธมนฺโตฯ

[1018] ทสมํ อุตฺตานตฺถเมวฯ

จิตฺตาคารวคฺควณฺณนา นิฏฺฐิตาฯ

[1021] อารามวคฺเค สพฺพํ อุตฺตานตฺถเมวฯ

[1067] คพฺภินิวคฺเคปิ สพฺพํ สุวิญฺเญยฺยเมวฯ

8. กุมาริภูตวคฺควณฺณนา

[1119] กุมาริภูตวคฺคสฺส ปฐเม สพฺพปฐมา ทฺเว มหาสิกฺขมานาติ คพฺภินิวคฺเค สพฺพปฐมํ วุตฺตา ทฺเว สิกฺขมานาฯ สิกฺขมานา อิจฺเจว วตฺตพฺพาติ สมฺมุติกมฺมาทีสุ เอวํ วตฺตพฺพาฯ คิหิคตาติ วา กุมาริภูตาติ วา น วตฺตพฺพาติ สเจ วทนฺติ, กมฺมํ กุปฺปตีติ อธิปฺปาโยฯ อิโต ปรํ นวมปริโยสานํ อุตฺตานตฺถเมวฯ

[1163] ทสเม อปุพฺพสมุฏฺฐานสีสนฺติ ปฐมปาราชิกสมุฏฺฐานาทีสุ เตรสสุ สมุฏฺฐาเนสุ อนนุญฺญาตสมุฏฺฐานํ สนฺธาย วุตฺตํฯ ตญฺหิ อิโต ปุพฺเพ ตาทิสสฺส สมุฏฺฐานสีสสฺส อนาคตตฺตา ‘‘อปุพฺพสมุฏฺฐานสีส’’นฺติ วุตฺตํฯ

[1166] เอกาทสมาทีนิ อุตฺตานตฺถาเนวฯ

กุมาริภูตวคฺควณฺณนา นิฏฺฐิตาฯ