[856-857] ปญฺจเม อโนวสฺสกํ อติกฺกาเมนฺติยาติ ฉนฺนสฺส อนฺโต นิสีทิตฺวา ปกฺกมนฺติํ สนฺธาย วุตฺตํฯ ‘‘อุปจาโร ทฺวาทสหตฺโถ’’ติ วทนฺติฯ ปลฺลงฺกสฺส อโนกาเสติ อูรุพทฺธาสนสฺส อโนกาเส อปฺปโหนฺเตฯ ปุเรภตฺตตา, อนฺตรฆเร นิสชฺชา, อาสนสฺส ปลฺลงฺโกกาสตา, อญฺญตฺร อนุญฺญาตการณา อนาปุจฺฉนํ, วุตฺตปริจฺเฉทาติกฺกโมติ อิมานิ ปเนตฺถ ปญฺจ องฺคานิฯ

[859-864] ฉฏฺฐสตฺตมาทีนิ อุตฺตานตฺถาเนวฯ

อนฺธการวคฺควณฺณนา นิฏฺฐิตาฯ

3. นคฺควคฺควณฺณนา

[883-887] นคฺควคฺคสฺส ปฐมทุติยานิ อุตฺตานตฺถาเนวฯ

[893] ตติเย วิสิพฺเพตฺวาติ ทุสฺสิพฺพิตํ ปุน สิพฺพนตฺถาย วิสิพฺเพตฺวา วิชเฏตฺวาฯ อญฺญตฺร จตูหปญฺจาหาติ วิสิพฺพิตทิวสโต ปญฺจ ทิวเส อติกฺกมิตฺวาฯ นิวาสนปาวุรณูปคจีวรตา, อุปสมฺปนฺนาย สนฺตกตา, สิพฺพนตฺถาย วิสิพฺพนํ วา วิสิพฺพาปนํ วา, อญฺญตฺร อนุญฺญาตการณา ปญฺจาหาติกฺกโม, ธุรนิกฺเขโปติ อิมานิ ปเนตฺถ ปญฺจ องฺคานิฯ

[898] จตุตฺเถ ปญฺจนฺนํ จีวรานนฺติ ติจีวรํ อุทกสาฏิกา สงฺกจฺจิกาติ อิเมสํ ปญฺจนฺนํ จีวรานํฯ ปญฺจนฺนํ จีวรานํ อญฺญตรตา, ปญฺจาหาติกฺกโม, อนุญฺญาตการณาภาโว, อปริวตฺตนนฺติ อิมานิ ปเนตฺถ จตฺตาริ องฺคานิฯ

[902] ปญฺจมํ อุตฺตานตฺถเมวฯ

[907] ฉฏฺเฐ จีวรลาภนฺติ ลภิตพฺพจีวรํฯ วิกปฺปนุปคปจฺฉิมตา, สงฺฆสฺส ปริณตภาโว, วินา อานิสํสทสฺสเนน อนฺตรายกรณนฺติ อิมานิ ปเนตฺถ ตีณิ องฺคานิฯ

[911] สตฺตมํ อุตฺตานตฺถเมวฯ

[916] อฏฺฐเม กุมฺภถูณํ นาม กุมฺภสทฺโท, เตน จรนฺติ กีฬนฺติ, ตํ วา สิปฺปํ เอเตสนฺติ กุมฺภถูณิกาฯ เตนาห ‘‘ฆฏเกน กีฬนกา’’ติฯ ทีฆนิกายฏฺฐกถายํ (ที. นิ. อฏฺฐ. 1.13) ปน ‘‘กุมฺภถูณํ นาม จตุรสฺสอมฺพณกตาฬ’’นฺติ วุตฺตํฯ จตุรสฺสอมฺพณกตาฬํ นาม รุกฺขสารทนฺตาทีสุ เยน เกนจิ จตุรสฺสอมฺพณํ กตฺวา จตูสุ ปสฺเสสุ จมฺเมน โอนนฺธิตฺวา กตวาทิตภณฺฑํฯ พิมฺพิสกนฺติปิ ตสฺเสว เววจนํ, ตํ วาเทนฺติ, ตํ วา สิปฺปํ เอเตสนฺติ กุมฺภถูณิกาฯ เตนาห ‘‘พิมฺพิสกวาทกาติปิ วทนฺตี’’ติฯ สมณจีวรตา, ฐเปตฺวา สหธมฺมิเก มาตาปิตโร จ อญฺเญสํ ทานํ, อตาวกาลิกตาติ อิมานิ ปเนตฺถ ตีณิ องฺคานิฯ

[920] นวมํ อุตฺตานตฺถเมวฯ

[927] ทสเม ธมฺมิกํ กถินุทฺธารนฺติ สพฺพาสํ ภิกฺขุนีนํ อกาลจีวรํ ทาตุกาเมน อุปาสเกน ยตฺตโก อตฺถารมูลโก อานิสํโส, ตโต อธิกํ วา สมกํ วา ทตฺวา ยาจิตเกน สมคฺเคน ภิกฺขุนิสงฺเฆน ยํ กถินํ ญตฺติทุติเยน กมฺเมน อนฺตรา อุทฺธรียติ, ตสฺส โส อุทฺธาโร ธมฺมิโกติ วุจฺจติ, เอวรูปํ กถินุทฺธารนฺติ อตฺโถฯ เสสํ อุตฺตานตฺถเมวฯ

นคฺควคฺควณฺณนา นิฏฺฐิตาฯ

[932] ตุวฏฺฏวคฺเค สพฺพํ อุตฺตานเมวฯ

5. จิตฺตาคารวคฺควณฺณนา

[978] จิตฺตาคารวคฺคสฺส ปฐเม กีฬนอุปวนนฺติ อนฺโตนคเร ฐิตํ สนฺธาย วุตฺตํ, กีฬนุยฺยานนฺติ พหินคเร ฐิตํ สนฺธายฯ ปาเฏกฺกา อาปตฺติโยติ คีวาย ปริวฏฺฏนปฺปโยคคณนาย อาปตฺติโย, น อุมฺมีลนคณนายฯ ‘‘อชฺฌาราเม ราชาคาราทีนิ กโรนฺติ , ตานิ ปสฺสนฺติยา อนาปตฺตี’’ติ วจนโต ‘‘อนฺโตอาราเม ตตฺถ ตตฺถ คนฺตฺวา นจฺจาทีนิ ปสฺสิตุํ ลภตี’’ติปิ สิทฺธํฯ