น หิ กรเณ วา การาปเน วา วิเสโส อตฺถิ, ตสฺมา อญฺญาย วิญฺญตฺติยา ลทฺธํ สยํ ภชฺชนาทีนิ กตฺวาปิ การาเปตฺวาปิ ภุญฺชนฺติยา ทุกฺกฏเมวาติ อิทเมตฺถ สนฺนิฏฺฐานํฯ อวิเสเสน วุตฺตนฺติ กรณการาปนานํ สามญฺญโต วุตฺตํฯ เสสเมตฺถ อุตฺตานเมวฯ สตฺตนฺนํ ธญฺญานํ อญฺญตรสฺส วิญฺญาปนํ วา วิญฺญาปาปนํ วา, ปฏิลาโภ, ภชฺชนาทีนิ กตฺวา วา กาเรตฺวา วา อชฺโฌหรณนฺติ อิมานิ ปเนตฺถ ตีณิ องฺคานิฯ

[824] อฏฺฐเม นิพฺพิฏฺโฐติ ปติฏฺฐาปิโตฯ เกณีติ รญฺโญ ทาตพฺพสฺส อายสฺเสตํ อธิวจนํฯ ฐานนฺตรนฺติ คามชนปทาทิฐานนฺตรํฯ เสสเมตฺถ อุตฺตานเมวฯ อุจฺจาราทิภาโว, อนวโลกนํ, วฬญฺชนฏฺฐานํ, ติโรกุฏฺฏปาการตา, ฉฑฺฑนํ วา ฉฑฺฑาปนํ วาติ อิมานิ ปเนตฺถ ปญฺจ องฺคานิฯ

[830] นวเม สพฺเพสนฺติ ภิกฺขุสฺส ภิกฺขุนิยา จฯ อิธ เขตฺตปาลกา อารามาทิโคปกา จ สามิกา เอวฯ

[836] ทสเม เอกปโยเคนาติ เอกทิสาวโลกนปโยเคนฯ เตสํเยวาติ เยสํ นจฺจํ ปสฺสติฯ กิญฺจาปิ สยํ นจฺจนาทีสุ ปาจิตฺติยํ ปาฬิยํ น วุตฺตํ, ตถาปิ อฏฺฐกถาปมาเณน คเหตพฺพนฺติ ทสฺเสตุํ ‘‘สพฺพอฏฺฐกถาสุ วุตฺต’’นฺติ อาหฯ ‘‘อาราเม ฐตฺวาติ น เกวลํ ฐตฺวา, ตโต ตโต คนฺตฺวาปิ สพฺพิริยาปเถหิ ลภติ, ‘อาราเม ฐิตา’ติ ปน อารามปริยาปนฺนภาวทสฺสนตฺถํ วุตฺตํฯ อิตรถา นิสินฺนาปิ น ลเภยฺยา’’ติ ตีสุปิ คณฺฐิปเทสุ วุตฺตํฯ เสสเมตฺถ อุตฺตานเมวฯ นจฺจาทีนํ อญฺญตรตา, อญฺญตฺร อนุญฺญาตการณา คมนํ, ทสฺสนํ วา สวนํ วาติ อิมานิ ปเนตฺถ ตีณิ องฺคานิฯ

ลสุณวคฺควณฺณนา นิฏฺฐิตาฯ

2. อนฺธการวคฺควณฺณนา

[841] อนฺธการวคฺคสฺส ปฐเม ทาเน วา ปูชาย วาติ ทานนิมิตฺตํ วา ปูชานิมิตฺตํ วาฯ มนฺเตตีติ กเถติฯ รตฺตนฺธการตา, ปุริสสฺส หตฺถปาเส ฐานํ วา สลฺลปนํ วา, สหายาภาโว, รโหเปกฺขตาติ อิมานิ ปเนตฺถ จตฺตาริ องฺคานิฯ

[842-846] ทุติยตติยจตุตฺถานิ อุตฺตานตฺถาเนวฯ

[856-857] ปญฺจเม อโนวสฺสกํ อติกฺกาเมนฺติยาติ ฉนฺนสฺส อนฺโต นิสีทิตฺวา ปกฺกมนฺติํ สนฺธาย วุตฺตํฯ ‘‘อุปจาโร ทฺวาทสหตฺโถ’’ติ วทนฺติฯ ปลฺลงฺกสฺส อโนกาเสติ อูรุพทฺธาสนสฺส อโนกาเส อปฺปโหนฺเตฯ ปุเรภตฺตตา, อนฺตรฆเร นิสชฺชา, อาสนสฺส ปลฺลงฺโกกาสตา, อญฺญตฺร อนุญฺญาตการณา อนาปุจฺฉนํ, วุตฺตปริจฺเฉทาติกฺกโมติ อิมานิ ปเนตฺถ ปญฺจ องฺคานิฯ

[859-864] ฉฏฺฐสตฺตมาทีนิ อุตฺตานตฺถาเนวฯ

อนฺธการวคฺควณฺณนา นิฏฺฐิตาฯ

3. นคฺควคฺควณฺณนา

[883-887] นคฺควคฺคสฺส ปฐมทุติยานิ อุตฺตานตฺถาเนวฯ

[893] ตติเย วิสิพฺเพตฺวาติ ทุสฺสิพฺพิตํ ปุน สิพฺพนตฺถาย วิสิพฺเพตฺวา วิชเฏตฺวาฯ อญฺญตฺร จตูหปญฺจาหาติ วิสิพฺพิตทิวสโต ปญฺจ ทิวเส อติกฺกมิตฺวาฯ นิวาสนปาวุรณูปคจีวรตา, อุปสมฺปนฺนาย สนฺตกตา, สิพฺพนตฺถาย วิสิพฺพนํ วา วิสิพฺพาปนํ วา, อญฺญตฺร อนุญฺญาตการณา ปญฺจาหาติกฺกโม, ธุรนิกฺเขโปติ อิมานิ ปเนตฺถ ปญฺจ องฺคานิฯ

[898] จตุตฺเถ ปญฺจนฺนํ จีวรานนฺติ ติจีวรํ อุทกสาฏิกา สงฺกจฺจิกาติ อิเมสํ ปญฺจนฺนํ จีวรานํฯ ปญฺจนฺนํ จีวรานํ อญฺญตรตา, ปญฺจาหาติกฺกโม, อนุญฺญาตการณาภาโว, อปริวตฺตนนฺติ อิมานิ ปเนตฺถ จตฺตาริ องฺคานิฯ

[902] ปญฺจมํ อุตฺตานตฺถเมวฯ

[907] ฉฏฺเฐ จีวรลาภนฺติ ลภิตพฺพจีวรํฯ วิกปฺปนุปคปจฺฉิมตา, สงฺฆสฺส ปริณตภาโว, วินา อานิสํสทสฺสเนน อนฺตรายกรณนฺติ อิมานิ ปเนตฺถ ตีณิ องฺคานิฯ

[911] สตฺตมํ อุตฺตานตฺถเมวฯ