เมนู

6. ฉฏฺฐสงฺฆาทิเสสสิกฺขาปทวณฺณนา

[705] ฉฏฺเฐ ปริวารคาถาย อยมตฺโถฯ น เทติ น ปฏิคฺคณฺหาตีติ (ปริ. อฏฺฐ. 481) น อุยฺโยชิกา เทติ, นาปิ อุยฺโยชิตา ตสฺสา หตฺถโต คณฺหาติ ปฏิคฺคโห เตน น วิชฺชตีติ เตเนว การเณน อุยฺโยชิกาย หตฺถโต อุยฺโยชิตาย ปฏิคฺคโห น วิชฺชติฯ อาปชฺชติ ครุกนฺติ เอวํ สนฺเตปิ อวสฺสุตสฺส หตฺถโต ปิณฺฑคฺคหเณ อุยฺโยเชนฺตี สงฺฆาทิเสสาปตฺติํ อาปชฺชติฯ ตญฺจ ปริโภคปจฺจยาติ ตญฺจ ปน อาปตฺติํ อาปชฺชมานา ตสฺสา อุยฺโยชิตาย ปริโภคปจฺจยา อาปชฺชติฯ ตสฺสา หิ โภชนปริโยสาเน อุยฺโยชิกาย สงฺฆาทิเสโส โหติฯ เสสเมตฺถ อุตฺตานเมวฯ มนุสฺสปุริสตา, อญฺญตฺร อนุญฺญาตการณา ขาทนียํ โภชนียํ คเหตฺวา ภุญฺชาติ อุยฺโยชนา, เตน วจเนน คเหตฺวา อิตริสฺสา โภชนปริโยสานนฺติ อิมานิ ปเนตฺถ ตีณิ องฺคานิฯ

ฉฏฺฐสงฺฆาทิเสสสิกฺขาปทวณฺณนา นิฏฺฐิตาฯ

7. สตฺตมสงฺฆาทิเสสสิกฺขาปทวณฺณนา

[709] สตฺตเม กินฺนุมาว สมณิโยติ กิํ นุ อิมา เอว สมณิโยฯ ตาสาหนฺติ ตาสํ อหํฯ เสสํ อุตฺตานเมวฯ

สตฺตมสงฺฆาทิเสสสิกฺขาปทวณฺณนา นิฏฺฐิตาฯ

[715] อฏฺฐมํ อุตฺตานตฺถเมวฯ

9. นวมสงฺฆาทิเสสสิกฺขาปทวณฺณนา

[721] นวเม วชฺชปฺปฏิจฺฉาทิกาติ ขุทฺทานุขุทฺทกวชฺชสฺส ปฏิจฺฉาทิกาฯ สมนุภาสนกมฺมกาเล เจตฺถ ทฺเว ติสฺโส เอกโต สมนุภาสิตพฺพาฯ

นวมสงฺฆาทิเสสสิกฺขาปทวณฺณนา นิฏฺฐิตาฯ

[727] ทสมํ อุตฺตานตฺถเมวฯ

ภิกฺขุนีวิภงฺเค สงฺฆาทิเสสวณฺณนา นิฏฺฐิตาฯ

สงฺฆาทิเสสกณฺฑํ นิฏฺฐิตํฯ

3. นิสฺสคฺคิยกณฺฑํ (ภิกฺขุนีวิภงฺควณฺณนา)

[733] นิสฺสคฺคิเยสุ ปฐมํ อุตฺตานเมวฯ

[740] ทุติเย ‘‘อยฺยาย ทมฺมีติ เอวํ ปฏิลทฺธนฺติ นิสฺสฏฺฐปฏิลทฺธํฯ เตเนว มาติกาฏฺฐกถายมฺปิ ‘‘นิสฺสฏฺฐํ ปฏิลภิตฺวาปิ ยถาทาเนเยว อุปเนตพฺพ’’นฺติ วุตฺตํฯ ยถาทาเนเยว อุปเนตพฺพนฺติ ยถา ทายเกน ทินฺนํ, ตถา อุปเนตพฺพํ, อกาลจีวรปกฺเขเยว ฐเปตพฺพนฺติ วุตฺตํ โหติฯ เอตฺถ จ ภาชาปิตาย ลทฺธจีวรเมว นิสฺสคฺคิยํ โหติ, ตํ วินยกมฺมํ กตฺวาปิ อตฺตนา น ลภติฯ เสสเมตฺถ อุตฺตานเมวฯ อกาลจีวรตา, ตถาสญฺญิตา, กาลจีวรนฺติ อธิฏฺฐาย เลเสน ภาชาปนํ, ปฏิลาโภติ อิมานิ ปเนตฺถ จตฺตาริ องฺคานิฯ

[743] ตติเย เมตนฺติ เม เอตํฯ สกสญฺญาย คหิตตฺตา ปาจิตฺติยํ ทุกฺกฏญฺจ วุตฺตํฯ อิตรถา ภณฺฑคฺเฆน กาเรตพฺพํฯ อุปสมฺปนฺนตา, ปริวตฺติตจีวรสฺส วิกปฺปนุปคตา, สกสญฺญาย อจฺฉินฺทนํ วา อจฺฉินฺทาปนํ วาติ อิมานิ ปเนตฺถ ตีณิ องฺคานิฯ

[748-752] จตุตฺเถ อาหฏสปฺปิํ ทตฺวาติ อตฺตโน ทตฺวาฯ ยมกํ ปจิตพฺพนฺติ สปฺปิญฺจ เตลญฺจ เอกโต กตฺวา ปจิตพฺพํฯ เลเสน คเหตุกามตา, อญฺญสฺส วิญฺญาปนํ, ปฏิลาโภติ อิมานิ ปเนตฺถ ตีณิ องฺคานิฯ

[753] ปญฺจเม สาติ ถุลฺลนนฺทาฯ อยนฺติ อยํ สิกฺขมานาฯ เจตาเปตฺวาติ ชานาเปตฺวา อิจฺเจว อตฺโถติ อิธ วุตฺตํ, มาติกาฏฺฐกถายํ (กงฺขา. อฏฺฐ. อญฺญเจตาปนสิกฺขาปทวณฺณนา) ปน ‘‘อญฺญํ เจตาเปตฺวาติ อตฺตโน กปฺปิยภณฺเฑน อิทํ นาม อาหราติ อญฺญํ ปริวตฺตาเปตฺวา’’ติ วุตฺตํ, ตสฺมา ‘‘เจตาเปตฺวา’’ติ อิมสฺส ปริวตฺตาเปตฺวาติปิ อตฺโถ ทฏฺฐพฺโพฯ อญฺญํ เจตาเปยฺยาติ ‘‘เอวํ เม อิทํ ทตฺวา อญฺญมฺปิ อาหริสฺสตี’’ติ มญฺญมานา ‘‘น เม อิมินา อตฺโถ, อิทํ นาม เม อาหรา’’ติ ตโต อญฺญํ เจตาเปยฺยฯ