4. จตุตฺถสงฺฆาทิเสสสิกฺขาปทวณฺณนา

[694] จตุตฺเถ การกคณสฺสาติ อุกฺเขปนียกมฺมการกคณสฺสฯ เตจตฺตาลีสปฺปเภทํ วตฺตํ ขนฺธเก อาวิ ภวิสฺสติฯ เนตฺถารวตฺเตติ นิตฺถรณเหตุมฺหิ วตฺเตฯ เสสํ อุตฺตานเมวฯ ธมฺเมน กมฺเมน อุกฺขิตฺตตา, อญฺญตฺร อนุญฺญาตการณา โอสารณนฺติ อิมานิ ปเนตฺถ ทฺเว องฺคานิฯ

จตุตฺถสงฺฆาทิเสสสิกฺขาปทวณฺณนา นิฏฺฐิตาฯ

5. ปญฺจมสงฺฆาทิเสสสิกฺขาปทวณฺณนา

[701] ปญฺจเม เอตํ น วุตฺตนฺติ ‘‘ภิกฺขุนิยา อวสฺสุตภาโว ทฏฺฐพฺโพ’’ติ เอตํ นิยมนํ น วุตฺตํฯ ตนฺติ ตํ นิยเมตฺวา อวจนํฯ ปาฬิยา สเมตีติ ‘‘เอกโต อวสฺสุเต’’ติ อวิเสเสตฺวา วุตฺตปาฬิยา ‘‘อนวสฺสุโตติ ชานนฺตี ปฏิคฺคณฺหาตี’’ติ อิมาย จ ปาฬิยา สเมติฯ ยทิ หิ ปุคฺคลสฺส อวสฺสุตภาโว นปฺปมาณํ, กิํ ‘‘อนวสฺสุโตติ ชานนฺตี’’ติ อิมินา วจเนน, ‘‘อนาปตฺติ อุภโตอนวสฺสุตา โหนฺติ, อนวสฺสุตา ปฏิคฺคณฺหาตี’’ติ เอตฺตกเมว วตฺตพฺพํ สิยาฯ ‘‘อุภโตอนวสฺสุตา โหนฺติ, อนวสฺสุโตติ ชานนฺตี ปฏิคฺคณฺหาตี’’ติ อิมสฺส จ อนาปตฺติวารสฺส อยมตฺโถฯ อุโภ เจ อนวสฺสุตา, สพฺพถาปิ อนาปตฺติฯ อถ ภิกฺขุนี อนวสฺสุตา สมานา อวสฺสุตมฺปิ ‘‘อนวสฺสุโต’’ติ สญฺญาย ตสฺส หตฺถโต ปฏิคฺคณฺหาติ, เอวมฺปิ อนาปตฺติฯ อถ สยํ อนวสฺสุตาปิ อญฺญํ อนวสฺสุตํ วา อวสฺสุตํ วา ‘‘อวสฺสุโต’’ติ ชานาติ, ทุกฺกฏเมวฯ วุตฺตญฺเหตํ อนนฺตรสิกฺขาปเท ‘‘กิสฺส ตฺวํ อยฺเย น ปฏิคฺคณฺหาสีติฯ อวสฺสุตา อยฺเยติฯ ตฺวํ ปน อยฺเย อวสฺสุตาติฯ นาหํ อยฺเย อวสฺสุตา’’ติฯ เสสเมตฺถ อุตฺตานเมวฯ อุทกทนฺตโปนโต อญฺญํ อชฺโฌหรณียํ, อุภโตอวสฺสุตตา, สหตฺถา คหณํ, อชฺโฌหรณนฺติ อิมานิ ปเนตฺถ จตฺตาริ องฺคานิฯ

ปญฺจมสงฺฆาทิเสสสิกฺขาปทวณฺณนา นิฏฺฐิตาฯ