เมนู

อปฺปฏิวิทฺธากุปฺโปว ตตฺถปรินิพฺพายตีติ ปุฏฺโฐ อิเธว ภาวิเตน มคฺเคน ตสฺส อกุปฺปปฏิเวธํ อิจฺฉนฺโต ปฏิกฺขิปติฯ

ยถา มิโคติ ปฐมํ อุทาหรณํ ปรวาทิสฺส, ทุติยํ สกวาทิสฺสฯ เสสํ สพฺพตฺถ อุตฺตานตฺถเมวาติฯ

พฺรหฺมจริยกถา นิฏฺฐิตาฯ

3. โอธิโสกถาวณฺณนา

[274] อิทานิ โอธิโสกถา นาม โหติฯ ตตฺถ เย โสตาปนฺนาทีนํ นานาภิสมยวเสน ทุกฺขทสฺสนาทีหิ โอธิโส โอธิโส เอกเทเสน เอกเทเสน กิเลสปฺปหานํ อิจฺฉนฺติ เสยฺยถาปิ เอตรหิ สมฺมิติยาทโย, เตสํ ตํ ลทฺธิํ ภินฺทิตุํ โอธิโสติ ปุจฺฉา สกวาทิสฺส, ปฏิญฺญา ปรวาทิสฺสฯ ปุน อนุโยโค สกวาทิสฺส, เอกเทเสน โสตาปนฺนาทิภาวสฺส อภาวโต ปฏิกฺเขโป ปรวาทิสฺสฯ อิมินา อุปาเยน สพฺพวาเรสุ อตฺโถ เวทิตพฺโพติฯ

โอธิโสกถาวณฺณนาฯ

4. ชหติกถา

1. นสุตฺตาหรณกถาวณฺณนา

[279] อิทานิ ชหติกถา นาม โหติฯ ตตฺถ เยสํ ‘‘ฌานลาภี ปุถุชฺชโน สห สจฺจาภิสมยา อนาคามี นาม โหติ, ตสฺส ปุถุชฺชนกาเลเยว กามราคพฺยาปาทา ปหีนา’’ติ ลทฺธิ เสยฺยถาปิ เอตรหิ สมฺมิติยานํ, เตสํ ตํ ลทฺธิํ ภินฺทิตุํ ชหติ ปุถุชฺชโนติ ปุจฺฉา สกวาทิสฺส, ฌานวิกฺขมฺภิตานํ ปน เตสํ ปริยุฏฺฐานํ อปสฺสนฺตสฺส ปฏิญฺญา ปรวาทิสฺสฯ ยสฺมา ปน เตสํ ฌานวิกฺขมฺภิตานมฺปิ อนาคามิมคฺเคเนว อจฺจนฺตํ ปหานํ โหติ, ตสฺมา ปุน อจฺจนฺตนฺติอาทิอนุโยโค สกวาทิสฺส, ตถารูปสฺส ปหานสฺส อภาวโต ปฏิกฺเขโป อิตรสฺสฯ วิกฺขมฺเภตีติ อจฺจนฺตวิกฺขมฺภนเมว สนฺธาย ปุจฺฉา สกวาทิสฺสฯ ตโต ปรํ อนาคามิมคฺคฏฺเฐน สทฺธิํ ปุถุชฺชนสํสนฺทนํ โหติฯ ตํ อุตฺตานตฺถเมวฯ

[280] ตโต ปรํ อนาคามิผเล สณฺฐาตีติ ปุฏฺโฐ ฌานานาคามิตํ สนฺธาย ปฏิชานาติฯ อรหตฺเต สณฺฐาตีติ ปุฏฺโฐ ทสฺสนมคฺเคน อุทฺธมฺภาคิยานํ ปหานาภาวโต ปฏิกฺขิปติฯ

อปุพฺพํ อจริมํ ตโย มคฺเคติ ปุฏฺโฐ ตถารูปาย ภาวนาย อภาวา ปฏิกฺขิปติฯ ปุน ปุฏฺโฐ ติณฺณํ มคฺคานํ กิจฺจสพฺภาวํ สนฺธาย ปฏิชานาติฯ สามญฺญผลปุจฺฉาสุปิ เอเสว นโยฯ กตเมน มคฺเคนาติ ปุฏฺโฐ อนาคามิมคฺเคนาติ ฌานานาคามิตํ สนฺธาย วทติฯ ปุน สํโยชนปฺปหานํ ปุฏฺโฐ ติณฺณํ อนาคามิมคฺเคน เตสํ กิเลสานํ อปฺปเหยฺยตฺตา ปฏิกฺขิปติฯ ทุติยํ ปุฏฺโฐ ปฐมมคฺคสฺเสว ฌานานาคามิมคฺคภาวํ สนฺธาย ปฏิชานาติฯ เสสเมตฺถ อุตฺตานตฺถเมวาติฯ

ชหติกถาฯ