อิโต ปรํ ‘‘กลฺยาณปาปกานี’’ติ อวตฺวา เหฏฺฐา วุตฺตนยา เอว ‘‘กมฺมํ อตฺถี’’ติอาทินา วิกปฺเปน ทสฺสิตาฯ เตสมฺปิ เหฏฺฐา วุตฺตนเยเนว อตฺโถ เวทิตพฺโพฯ
ปุริสการานุโยควณฺณนาฯ
กลฺยาณวคฺโคติปิ เอตสฺเสว นามํฯ
14. อภิญฺญานุโยควณฺณนา
[193] อิโต ปรํ อภิญฺญานุโยคาทิวเสน อรหตฺตสาธนา โหติฯ ตตฺถ อามนฺตาติ สกวาทินา ปฏิญฺญาเต ปรวาที ‘‘พหิทฺธา อนินฺทฺริยพทฺธรูเป อิทฺธิวิธาทิวิเสสาธิคโม นตฺถิ, อชฺฌตฺตํ อตฺถิ, ตสฺมา อิทฺธาทินิพฺพตฺตเกน ปุคฺคเลน ภวิตพฺพ’’นฺติ มญฺญมาโน นนุ อตฺถิ โกจิ อิทฺธิํ วิกุพฺพตีติอาทิมาหฯ ตํ สพฺพํ อุตฺตานตฺถเมวฯ
อภิญฺญานุโยควณฺณนาฯ
15-18. ญาตกานุโยคาทิวณฺณนา
[197] อิทานิ มาตาติอาทิโก ญาตกานุโยโคฯ ขตฺติโยติอาทิโก ชาติอนุโยโคฯ คหฏฺโฐ ปพฺพชิโตติ ปฏิปตฺติอนุโยโคฯ เทโว มนุสฺโสติ อุปปตฺติอนุโยโคฯ โสตาปนฺโนติอาทิโก ปฏิเวธานุโยโค, อริยานุโยโคติปิ วุจฺจติฯ เต สพฺเพ อุตฺตานตฺถาเยวฯ ‘‘อรหา หุตฺวา น อรหา’’ติ ปเนตฺถ โมฆปญฺหตฺตา น วุตฺตํฯ
[206] จตฺตาโร ปุริสยุคาติอาทิ สํฆานุโยโค, โสปิ อุตฺตานตฺโถเยวฯ
[209] สงฺขโตติอาทิ สจฺจิกฏฺฐสภาวานุโยโคฯ ตตฺถ ตติยา โกฏีติ ปุจฺฉา สกวาทิสฺสฯ ตถารูปสฺส สจฺจิกฏฺฐสฺส อภาวโต ปฏิกฺเขโป ปรวาทิสฺสฯ ปุน ปุฏฺโฐ ปุคฺคลํ สนฺธาย ปฏิญฺญา ตสฺเสวฯ
[211] อญฺโญ ปุคฺคโลติปญฺเหปิ สงฺขเตหิ ขนฺเธหิ อญฺญตฺตํ อนิจฺฉนฺโต ปฏิกฺเขโป ตสฺเสวฯ
[212] ขนฺธา สงฺขตาติอาทิ สงฺขตาสงฺขตานิ สรูเปน ทสฺเสตฺวา อญฺญตฺตปุจฺฉนตฺถํ วุตฺตํฯ
[213] รูปํ สงฺขตนฺติอาทิ ขนฺเธ วิภาคโต ทสฺเสตฺวา อญฺญตฺตปุจฺฉนตฺถํ วุตฺตํฯ
[214] ปุคฺคลสฺส อุปฺปาโทติ ปุจฺฉา สกวาทิสฺส, ‘‘ชาติธมฺมา ชราธมฺมา, อโถ มรณธมฺมิโน’’ติอาทิสุตฺตวเสน ปฏิญฺญา ปรวาทิสฺสฯ สงฺขตภาวํ ปนสฺส โส น อิจฺฉติ, ตสฺมา ปฏิกฺขิปติฯ
[215] ปุน น อุปฺปาโท ปญฺญายตีติอาทินา นเยน ปุฏฺโฐ ‘‘ทุกฺขเมว หิ สมฺโภติ , ทุกฺขํ ติฏฺฐติ เวติ จา’’ติอาทิวจนโต (สํ. นิ. 1.171) ปุคฺคลสฺส อุปฺปาทาทโย นาม น ยุชฺชนฺตีติ ปฏิชานาติฯ
[216] อตฺถตฺถมฺหีติ อตฺถํ วุจฺจติ นิพฺพานํฯ ตตฺถ อตฺถีติ ปุจฺฉติฯ ตสฺส อตฺถิตาย สสฺสตํ, นตฺถิตายฯ อุจฺเฉโท อาปชฺชติฯ ตทุภยมฺปิ อนิจฺฉนฺโต ปจฺฉา ปฏิกฺขิปติฯ
ญาตกานุโยคาทิวณฺณนาฯ
19. ปฏิเวธานุโยคาทิวณฺณนา
[217] ภวํ นิสฺสาย ปญฺเห ภวนฺติ อุปปตฺติภวํฯ
[218] เวทนํ เวทิยมานปญฺเห เวทนํ เวทิยมาโน ปริคฺคหิตเวทโน โยคาวจโรว ปชานาติ, พาลปุถุชฺชโน นปฺปชานาติฯ
[224] กายานุปสฺสนาทิปญฺหา อุตฺตานตฺถาเยวฯ
