[1030] สตฺตมวาเร สลกฺขณปริคฺคาหิกาย อภิญฺญาย วเสน อภิญฺเญยฺยตา เวทิตพฺพาฯ ญาตตีรณปหานปริญฺญานํ วเสน ปริญฺเญยฺยตาฯ สา จ รูปกฺขนฺโธ อภิญฺเญยฺโย ปริญฺเญยฺโย น ปหาตพฺโพติอาทีสุ ญาตตีรณปริญฺญาวเสเนว เวทิตพฺพาฯ สมุทยสจฺจํ อภิญฺเญยฺยํ ปริญฺเญยฺยํ ปหาตพฺพนฺติอาทีสุ ปหานปริญฺญาวเสนฯ

อฏฺฐมวาเร รูปาทิอารมฺมณานํ จกฺขุวิญฺญาณาทีนํ วเสน สารมฺมณานารมฺมณตา เวทิตพฺพาฯ นวมวาโร อุตฺตานตฺโถเยวฯ ทสมวาเรปิ ยํ วตฺตพฺพํ สิยา ตํ สพฺพํ ตตฺถ ตตฺถ ปญฺหาปุจฺฉกวาเร วุตฺตเมวาติฯ

สมฺโมหวิโนทนิยา วิภงฺคฏฺฐกถาย

ธมฺมหทยวิภงฺควณฺณนา นิฏฺฐิตาฯ

นิคมนกถา

เอตฺตาวตา จ –

อภิธมฺมํ เทเสนฺโต, ธมฺมครุ ธมฺมคารวยุตฺตานํ;

เทวานํ เทวปุเร, เทวคณสหสฺสปริวาโรฯ

ทุติยํ อทุติยปุริโส, ยํ อาห วิภงฺคปกรณํ นาโถ;

อฏฺฐารสหิ วิภงฺเคหิ, มณฺฑิตมณฺฑเปยฺยคุโณฯ

อตฺถปฺปกาสนตฺถํ, ตสฺสาหํ ยาจิโต ฐิตคุเณน;

ยตินา อทนฺธคตินา, สุพุทฺธินา พุทฺธโฆเสนฯ

ยํ อารภิํ รจยิตุํ, อฏฺฐกถํ สุนิปุเณสุ อตฺเถสุ;

สมฺโมหวิโนทนโต, สมฺโมหวิโนทนิํ นามฯ

โปราณฏฺฐกถานํ, สารํ อาทาย สา อยํ นิฏฺฐํ;

ปตฺตา อนนฺตราเยน, ปาฬิยา ภาณวาเรหิฯ

จตฺตาลีสาย ยถา, เอเกน จ เอวเมว สพฺเพปิ;

นิฏฺฐํ วชนฺตุ วิมลา, มโนรถา สพฺพสตฺตานํฯ

สทฺธมฺมสฺส ฐิตตฺถํ, ยญฺจ อิมํ รจยตา มยา ปุญฺญํ;

ปตฺตํ เตน สมตฺตํ, ปาปุณตุ สเทวโก โลโกฯ

สุจิรํ ติฏฺฐตุ ธมฺโม, ธมฺมาภิรโต สทา ภวตุ โลโก;

นิจฺจํ เขมสุภิกฺขาทิ-สมฺปทา ชนปทา โหนฺตูติฯ

ปรมวิสุทฺธสทฺธาพุทฺธิวีริยปฏิมณฺฑิเตน สีลาจารชฺชวมทฺทวาทิคุณสมุทยสมุทิเตน สกสมยสมยนฺตรคหนชฺโฌคาหณสมตฺเถน ปญฺญาเวยฺยตฺติยสมนฺนาคเตน ติปิฏกปริยตฺติปฺปเภเท สาฏฺฐกเถ สตฺถุสาสเน อปฺปฏิหตญาณปฺปภาเวน มหาเวยฺยากรเณน กรณสมฺปตฺติชนิตสุขวินิคฺคตมธุโรทารวจนลาวณฺณยุตฺเตน ยุตฺตมุตฺตวาทินา วาทีวเรน มหากวินา ปภินฺนปฏิสมฺภิทาปริวาเร ฉฬภิญฺญาปฏิสมฺภิทาทิปฺปเภทคุณปฏิมณฺฑิเต อุตฺตริมนุสฺสธมฺเม สุปฺปติฏฺฐิตพุทฺธีนํ เถรวํสปฺปทีปานํ เถรานํ มหาวิหารวาสีนํ วํสาลงฺการภูเตน วิปุลวิสุทฺธพุทฺธินา พุทฺธโฆโสติ ครูหิ คหิตนามเธยฺเยน เถเรน กตา อยํ สมฺโมหวิโนทนี นาม วิภงฺคฏฺฐกถาฯ

ตาว ติฏฺฐตุ โลกสฺมิํ, โลกนิตฺถรเณสินํ;

ทสฺเสนฺตี กุลปุตฺตานํ, นยํ ปญฺญาวิสุทฺธิยาฯ

ยาว พุทฺโธติ นามมฺปิ, สุทฺธจิตฺตสฺส ตาทิโน;

โลกมฺหิ โลกเชฏฺฐสฺส, ปวตฺตติ มเหสิโนติฯ

สมฺโมหวิโนทนี นาม วิภงฺค-อฏฺฐกถา นิฏฺฐิตาฯ