ฯ นโม ตสฺส ภควโต อรหโต สมฺมาสมฺพุทฺธสฺสฯ
อภิธมฺมปิฏเก
อฏฺฐสาลินี นาม
ธมฺมสงฺคณี-อฏฺฐกถา
คนฺถารมฺภกถา
กรุณา วิย สตฺเตสุ, ปญฺญา ยสฺส มเหสิโน;
เญยฺยธมฺเมสุ สพฺเพสุ, ปวตฺติตฺถ ยถารุจิฯ
ทยาย ตาย สตฺเตสุ, สมุสฺสาหิตมานโส;
ปาฏิหีราวสานมฺหิ, วสนฺโต ติทสาลเยฯ
ปาริจฺฉตฺตกมูลมฺหิ, ปณฺฑุกมฺพลนามเก;
สิลาสเน สนฺนิสินฺโน, อาทิจฺโจว ยุคนฺธเรฯ
จกฺกวาฬสหสฺเสหิ, ทสหาคมฺม สพฺพโส;
สนฺนิสินฺเนน เทวานํ, คเณน ปริวาริโตฯ
มาตรํ ปมุขํ กตฺวา, ตสฺสา ปญฺญาย เตชสา;
อภิธมฺมกถามคฺคํ, เทวานํ สมฺปวตฺตยิฯ
ตสฺส ปาเท นมสฺสิตฺวา, สมฺพุทฺธสฺส สิรีมโต;
สทฺธมฺมญฺจสฺส ปูเชตฺวา, กตฺวา สงฺฆสฺส จญฺชลิํฯ
นิปจฺจการสฺเสตสฺส, กตสฺส รตนตฺตเย;
อานุภาเวน โสเสตฺวา, อนฺตราเย อเสสโตฯ
วิสุทฺธาจารสีเลน, นิปุณามลพุทฺธินา;
ภิกฺขุนา พุทฺธโฆเสน, สกฺกจฺจํ อภิยาจิโตฯ
ยํ เทวเทโว เทวานํ, เทเสตฺวา นยโต ปุน;
เถรสฺส สาริปุตฺตสฺส, สมาจิกฺขิ วินายโกฯ
อโนตตฺตทเห กตฺวา, อุปฏฺฐานํ มเหสิโน;
ยญฺจ สุตฺวาน โส เถโร, อาหริตฺวา มหีตลํฯ
ภิกฺขูนํ ปยิรุทาหาสิ, อิติ ภิกฺขูหิ ธาริโต;
สงฺคีติกาเล สงฺคีโต, เวเทหมุนินา ปุนฯ
ตสฺส คมฺภีรญาเณหิ, โอคาฬฺหสฺส อภิณฺหโส;
นานานยวิจิตฺตสฺส, อภิธมฺมสฺส อาทิโตฯ
ยา มหากสฺสปาทีหิ, วสีหิฏฺฐกถา ปุรา;
สงฺคีตา อนุสงฺคีตา, ปจฺฉาปิ จ อิสีหิ ยาฯ
อาภตา ปน เถเรน, มหินฺเทเนตมุตฺตมํ;
ยา ทีปํ ทีปวาสีนํ, ภาสาย อภิสงฺขตาฯ
อปเนตฺวา ตโต ภาสํ, ตมฺพปณฺณินิวาสินํ;
อาโรปยิตฺวา นิทฺโทสํ, ภาสํ ตนฺตินยานุคํฯ
นิกายนฺตรลทฺธีหิ, อสมฺมิสฺสํ อนากุลํ;
มหาวิหารวาสีนํ, ทีปยนฺโต วินิจฺฉยํฯ
อตฺถํ ปกาสยิสฺสามิ, อาคมฏฺฐกถาสุปิ;
คเหตพฺพํ คเหตฺวาน, โตสยนฺโต วิจกฺขเณฯ
กมฺมฏฺฐานานิ สพฺพานิ, จริยาภิญฺญา วิปสฺสนา;
วิสุทฺธิมคฺเค ปนิทํ, ยสฺมา สพฺพํ ปกาสิตํฯ
ตสฺมา ตํ อคฺคเหตฺวาน, สกลายปิ ตนฺติยา;
ปทานุกฺกมโต เอว, กริสฺสามตฺถวณฺณนํฯ
อิติ เม ภาสมานสฺส, อภิธมฺมกถํ อิมํ;
อวิกฺขิตฺตา นิสาเมถ, ทุลฺลภา หิ อยํ กถาติฯ