นิคมนกถา
มหาวคฺโค มชฺฌิโม จ, จูฬวคฺโค จ นามโต;
ตโย วคฺคา อิธ วุตฺตา, ปมาณปฏิปาฏิยาฯ
วคฺเค วคฺเค ทส ทส, กถา ยา ตา อุทีริตา;
อุทฺทานคาถา สพฺพาสํ, อิมา ตาสํ ยถากฺกมํฯ
ญาณํ ทิฏฺฐิ อานาปานํ, อินฺทฺริยํ วิโมกฺขปญฺจมํ;
คติ กมฺมํ วิปลฺลาโส, มคฺโค มณฺโฑติ ตา ทสฯ
ยุคนทฺธสจฺจโพชฺฌงฺคา, เมตฺตา วิราคปญฺจมา;
ปฏิสมฺภิทา ธมฺมจกฺกํ, โลกุตฺตรพลสุญฺญตาฯ
ปญฺญา อิทฺธิ อภิสมโย, วิเวโก จริยปญฺจโม;
ปาฏิหีรํ สมสีส-สติ วิปสฺสนมาติกาฯ
โย โส สุคตสุตานํ, อธิปติภูเตน ภูตหิตรตินา;
เถเรน ถิรคุณวตา, วุตฺโต ปฏิสมฺภิทามคฺโคฯ
ตสฺสตฺถวณฺณนา ยา, ปุพฺพฏฺฐกถานยํ ตถา ยุตฺติํ;
นิสฺสาย มยารทฺธา, นิฏฺฐานมุปาคตา เอสาฯ
ยํ ตํ อุตฺตรมนฺตี, มนฺติคุณยุโต ยุโต จ สทฺธาย;
การยิ มหาวิหาเร, ปริเวณมเนกสาธุคุณํฯ
เถเรเนตฺถ นิวสตา, สมาปิตายํ มหาภิธาเนน;
ตติเย วสฺเส จุติโต, โมคฺคลฺลานสฺส ภูปติโนฯ
สมยํ อนุโลเมนฺตี, เถรานํ เถรวาททีปานํ;
นิฏฺฐํ คตา ยถายํ, อฏฺฐกถา โลกหิตชนนีฯ
ธมฺมํ อนุโลเมนฺตา, อตฺตหิตํ ปรหิตญฺจ สาเธนฺตา;
นิฏฺฐํ คจฺฉนฺตุ ตถา, มโนรถา สพฺพสตฺตานํฯ
สทฺธมฺมปกาสินิยา, อฏฺฐกถาเยตฺถ คณิตกุสเลหิ;
คณิตา ตุ ภาณวารา, วิญฺเญยฺยา อฏฺฐปญฺญาสฯ
อานุฏฺฐุเภน อสฺสา, ฉนฺโทพนฺเธน คณิยมานา ตุ;
จุทฺทสสหสฺสสงฺขา, คาถาโย ปญฺจ จ สตานิฯ
สาสนจิรฏฺฐิตตฺถํ, โลกหิตตฺถญฺจ สาทเรน มยา;
ปุญฺญํ อิมํ รจยตา, ยํ ปตฺตมนปฺปกํ วิปุลํฯ
ปุญฺเญน เตน โลโก, สทฺธมฺมรสายนํ ทสพลสฺส;
อุปภุญฺชิตฺวา วิมลํ, ปปฺโปตุ สุขํ สุเขเนวาติฯ
สทฺธมฺมปฺปกาสินี นาม
ปฏิสมฺภิทามคฺคปฺปกรณสฺส อฏฺฐกถา นิฏฺฐิตาฯ