เมนู

3. ตติยสิกฺขาปทวณฺณนา

[1190] ตติเย วิปฺปกิริยิํสูติ มณโย วิปฺปกิณฺณาฯ อิธาปิ โอมุญฺจิตฺวา ธาเรนฺติยา ปโยคคณนาย อาปตฺติโยฯ สมุฏฺฐานาทีนิ วุตฺตนยาเนวฯ เกวลํ อิธ อกุสลจิตฺตํ โหตีติฯ

ตติยสิกฺขาปทํฯ

4. จตุตฺถสิกฺขาปทวณฺณนา

[1194] จตุตฺเถ – สีสูปคาทีสุ ยํ ยํ ธาเรติ, ตสฺส ตสฺส วเสน วตฺถุคณนาย อาปตฺติโย เวทิตพฺพาฯ เสสํ ตติเย วุตฺตนยเมวาติฯ

จตุตฺถสิกฺขาปทํฯ

5. ปญฺจมสิกฺขาปทวณฺณนา

[1199] ปญฺจเม – คนฺธวณฺณเกนาติ คนฺเธน จ วณฺณเกน จฯ เสสํ อุตฺตานเมวฯ สมุฏฺฐานาทีนิ ตติยสทิสาเนวาติฯ

ปญฺจมสิกฺขาปทํฯ

6. ฉฏฺฐสิกฺขาปทวณฺณนา

[1202] ฉฏฺเฐ – สพฺพํ ปญฺจเม วุตฺตสทิสเมวาติฯ

ฉฏฺฐสิกฺขาปทํฯ

7. สตฺตมสิกฺขาปทวณฺณนา

[1208-9] สตฺตเม – อุมฺมทฺทาเปติ อาปตฺติ ปาจิตฺติยสฺสาติ เอตฺถ หตฺถํ อโมเจตฺวา อุมฺมทฺทเน เอกาว อาปตฺติ, โมเจตฺวา โมเจตฺวา อุมฺมทฺทเน ปโยคคณนาย อาปตฺติโยฯ สมฺพาหเนปิ เอเสว นโยฯ คิลานายาติ อนฺตมโส มคฺคคมนปริสฺสเมนาปิ สาพาธายฯ อาปทาสูติ โจรภยาทีหิ สรีรกมฺปนาทีสุฯ เสสํ อุตฺตานเมวฯ สมุฏฺฐานาทีนิ ตติยสทิสาเนวาติฯ

สตฺตมสิกฺขาปทํฯ

8-9-10. อฏฺฐมนวมทสมสิกฺขาปทวณฺณนา

[1210] อฏฺฐมาทีสุ ตีสุ สิกฺขมานาย สามเณริยา, คิหินิยาติ อิทเมว นานากรณํ, เสสํ สตฺตเม วุตฺตสทิสเมวาติฯ

อฏฺฐมนวมทสมสิกฺขาปทานิฯ

11. เอกาทสมสิกฺขาปทวณฺณนา

[1214] เอกาทสเม – ภิกฺขุสฺส ปุรโตติ อภิมุขเมวาติ อตฺโถฯ อิทํ ปน อุปจารํ สนฺธาย กถิตนฺติ เวทิตพฺพํฯ เสสํ อุตฺตานเมวฯ กถินสมุฏฺฐานํ – กายวาจโต กายวาจาจิตฺตโต จ สมุฏฺฐาติ, กิริยากิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, วจีกมฺมํ, ติจิตฺตํ, ติเวทนนฺติฯ

เอกาทสมสิกฺขาปทํฯ

12. ทฺวาทสมสิกฺขาปทวณฺณนา

[1219-23] ทฺวาทสเม – อโนกาสกตนฺติ อสุกสฺมิํ นาม ฐาเน ปุจฺฉามีติ เอวํ อกตโอกาสํฯ เตเนวาห – ‘‘อโนกาสกตนฺติ อนาปุจฺฉา’’ติ อโนทิสฺสาติ อสุกสฺมิํ นาม ฐาเน ปุจฺฉามีติ เอวํ อนิยเมตฺวา เกวลํ ‘‘ปุจฺฉิตพฺพํ อตฺถิ, ปุจฺฉามิ อยฺยา’’ติ เอวํ วตฺวาฯ เสสํ อุตฺตานเมวฯ ปทโสธมฺมสมุฏฺฐานํ – วาจโต วาจาจิตฺตโต จ สมุฏฺฐาติ, กิริยากิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, วจีกมฺมํ, ติจิตฺตํ, ติเวทนนฺติฯ

ทฺวาทสมสิกฺขาปทํฯ