เมนู

2. องฺคุลิปโตทกสิกฺขาปทวณฺณนา

[330] ทุติเย องฺคุลิปโตทเกนาติ องฺคุลีหิ อุปกจฺฉกาทิฆฏฺฏนํ วุจฺจติฯ อุตฺตสนฺโตติ อติหาเสน กิลมนฺโตฯ อนสฺสาสโกติ อุปจฺฉินฺนอสฺสาสปสฺสาสสญฺจาโร หุตฺวาฯ อนุปสมฺปนฺนํ กาเยน กายนฺติ เอตฺถ ภิกฺขุนีปิ อนุปสมฺปนฺนฏฺฐาเน ฐิตา, ตมฺปิ ขิฑฺฑาธิปฺปาเยน ผุสนฺตสฺส ทุกฺกฏํฯ เสสเมตฺถ อุตฺตานเมวฯ

ปฐมปาราชิกสมุฏฺฐานํ – กิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, อกุสลจิตฺตํ, ทฺวิเวทนนฺติฯ

องฺคุลิปโตทกสิกฺขาปทํ ทุติยํฯ

3. หสธมฺมสิกฺขาปทวณฺณนา

[335] ตติเย อปฺปกตญฺญุโนติ ยํ ภควตา ปกตํ ปญฺญตฺตํ, ตํ น ชานนฺตีติ อตฺโถฯ

[336] อุทเก หสธมฺเมติ อุทกกีฬิกา วุจฺจติฯ อุปริโคปฺผเกติ โคปฺผกานํ อุปริภาคปฺปมาเณฯ หสาธิปฺปาโยติ กีฬาธิปฺปาโยฯ นิมุชฺชติ วาติอาทีสุ นิมุชฺชนตฺถาย โอโรหนฺตสฺส ปทวาเร ปทวาเร ทุกฺกฏํฯ นิมุชฺชนุมฺมุชฺชเนสุ ปโยเค ปโยเค ปาจิตฺติยํฯ นิมุชฺชิตฺวา อนฺโตอุทเกเยว คจฺฉนฺตสฺส หตฺถวารปทวาเรสุ สพฺพตฺถ ปาจิตฺติยํฯ ปลวตีติ ตรติฯ หตฺเถหิ ตรนฺตสฺส หตฺถวาเร หตฺถวาเร ปาจิตฺติยํฯ ปาเทสุปิ เอเสว นโยฯ เยน เยน องฺเคน ตรติ, ตสฺส ตสฺส ปโยเค ปโยเค ปาจิตฺติยํฯ ตีรโต วา รุกฺขโต วา อุทเก ปตติ, ปาจิตฺติยเมวฯ นาวาย กีฬตีติ ผิยาริตฺตาทีหิ นาวํ ปาเชนฺโต วา ตีเร อุสฺสาเรนฺโต วา นาวาย กีฬติ, ทุกฺกฏํฯ

หตฺเถน วาติอาทีสุปิ ปโยเค ปโยเค ทุกฺกฏํฯ เกจิ หตฺเถน อุทเก ขิตฺตาย กถลาย ปตนุปฺปตนวาเรสุ ทุกฺกฏํ วทนฺติ, ตํ น คเหตพฺพํฯ